Hverfisgæsla Foreldrar, munum eftir hverfisgæslunni. 9. bekkir eiga gæsluna í októbermánuði! Hverfisgæsla snýst ekki um að eiga börn á unglingastigi og þurfa að gæta þeirra. Hún snýst um að gæta hverfisins okkar, gera það betra, koma í veg fyrir hópamyndun, læti og skemmdarverk sem eru unnin í hverfinu. Því miður hefur borið meira á skemmdarverkum sl. ár sérstaklega við skólann og nú þegar er búið að brjóta rúður þar á þessu skólaári. Við þurfum virka hverfisgæslu til að snúa dæminu við. Hver árgangur eða bekkur innan skólans ber ábyrgð á hverfisgæslu einn mánuð í senn. Bekkjarfulltrúar skipuleggja röltið, þeir fá aðra foreldra í bekknum til að rölta. Mjög gott er að nýta sér Mentor til að senda út tölvupóst til foreldra (leiðbeiningar neðst á blaðinu). Einnig er mjög gott að senda hóp SMS á heimasíðu Símans og Vodafone. Í lok mánaðarins væri gott ef bekkjarfulltrúar gætu minnt næsta bekk á að komið sé að þeim. Gengið er á föstudagskvöldum frá klukkan 10 * 11 eða 9 * 10 . Best er að 4 * 5 gangi í einu en vissulega í lagi að það séu fleiri. Safnast er saman við aðalinngang Borgaskóla og endað þar aftur. Þeir sem ganga eru beðnir um að passa að láta sjá sig í kringum Borgaskóla, við Spöngina og koma við í Víkurskóla að öðru leyti er engin leið heppilegri en önnur, göngumenn meta hvar sé skynsamlegast að rölta. Ef göngumenn rekast á hóp unglinga er ekki ætlast til að höfð séu afskipti af þeim, heldur er tilgangurinn aðallega að láta sjá sig (og bjóða þeim "gott kvöld"). Ef einhver er með læti sem göngumenn telja rétt að hafa afskipti af eru þeir beðnir um að hringja í neyðarlínu sem gefur síðan samband við lögreglu. Óboðinn gestur Nú hefur lúsin stungið sér niður í skólanum og ekki gott að segja til um það hvað hún hefur dreift sér víða.  Foreldrar/forráðamenn eru beðnir um að fylgjast með hári barna sinna og kemba þau reglulega.  Í þeim árgöngum sem lúsin finnst þarf að kemba hár barna  daglega.  Bent er á leiðbeiningar um meðferð á heimasíðunni- Heilsugæsla- Meðferð við höfuðlús. Skólastjóri Ólympíustærðfræði fyrir grunnskóla. Háskólinn í Reykjavík býður upp á námskeið í Ólympíustærðfræði fyrir grunnskólabörn í 5. - 8. bekk, yngri nemendur geta tekið þátt hafi þau sérstakan áhuga. Ólympíustærðfræði eru þrautir sem settar eru fram í formi keppna. Lesa meira... Starfsdagur Mánudaginn 1. okt. verður starfsdagur hjá starfsfólki skólans.  Þann dag eru nemendur í leyfi.  Frístundaheimilið Hvergiland er opið fyrir þá nemendur sem þar eru skráðir frá kl. 8:00-17:15.                                                                              Skólastjóri   Frá aðalfundi foreldrafélags Mæting á aðalfund foreldrafélagsins var mun betri en í fyrra og viljum við þakka öllum kærlega fyrir komuna. Margar góðar ábendingar komu fram á fundinum sem munu nýtast vel til að bæta starf félagsins. Ný stjórn var kosin í foreldrafélagið og kosið í foreldraráð. Sjá nánar á heimasíðu foreldrafélags Stjórnin Skólahandbókin                                                                  Skólahandbókin er komin út og er vistuð á heimasíðu skólans undir Um skólann- Skólahandbók.  Þeir foreldrar/forráðamenn sem vilja fá hana útprentaða frá skólanum vinsamlegast hafi samband við skrifstofu skólans  borgask@borgaskoli.is /sími: 577-2900 eða umsjónarkennara barna sinna.  Sjá símatíma og netfang á stundaskrá.  Skólastjóri SPRON skólamót Fjölnis í Handbolta Sunnudaginn 23. september fór fram SPRON skólamót Fjölnis í handknattleik. 46 lið úr 7 grunnskólum Grafarvogs tóku þátt í mótinu. Borgaskóli var með 5 lið þ.e.: strákar 3.-4. bekk, 5.-6. bekk, 7.-8. bekk og 9.-10. bekk og stúlkur 7.-8. bekk. Krakkarnir stóðu sig frábærlega og fengu 2 bikara fyrir góðan árangur. Þetta voru strákar í 3.-4. bekk og strákar í 5.-6. bekk. Til hamingju krakkar. Myndir frá mótinu er hægt að sjá inná heimasíðu Borgaskóla undir myndir. Nemendur Borgaskóla vöktu athygli fyrir glæsilega skólabúninga. Víkurskóli vann annað árið í röð bikar fyrir bestan sameiginlegan árangur. Þökkum handknattleiksdeild Fjölnis kærlega fyrir ánægjulegan dag.

Útivistartími barna
Útivistarreglur eru bundnar í lög og okkur ber öllum að fara að lögum. Við sendum börnin okkar ýmis skilaboð og eitt af því er að fara eftir gildandi reglum jafnt um útivistartíma sem annað.

12 ára og yngri mega vera úti til kl. 20:00
Börn 12 ára og yngri mega ekki vera á almannafæri nema í fylgd með fullorðnum eftir kl. 20:00 á veturna og kl. 22:00 á sumrin.

13 - 16 ára til kl. 22:00
Unglingar 13 til 16 ára mega ekki vera á almannafæri eftir kl. 22:00 á veturna nema þeir séu á heimleið frá skóla, íþrótta- eða æskulýðssamkomu. Útivistartíminn lengist um tvær stundir á sumrin.

Fundur með foreldrum 1. bekkinga

Minnt er á fund með foreldrum/forráðamönnum 1. bekkinga þann 20. sept. kl. 17:00 þar sem fjallað verður um málefni er varða uppeldi og nám nemenda í fyrsta bekk.    Skólastjóri

Tölvur og upplýsingatækni Guðný Þorsteinsdóttir kennari í tölvum og upplýsingatækni hefur opnað glæsilega heimasíðu um nám og vinnu nemenda í þessari grein.  Heimasíðuna má skoða hér...


Haustfundir
Vikan 17.-21. september er haustfundavika. Foreldrar í hverjum árgangi eru boðaðir á sameiginlegan fund þar sem m.a. er rætt um vetrarstarfið sem framundan er. Allir fundir standa frá 8:20-9:30 nema fundur 1. bekkja sem er síðdegis. Boðið er upp á gæslu fyrir þá nemendur í 2.-4. bekk sem þess þurfa. Aðrir mæta í skólann kl. 10:00 eða eftir fyrirmælum kennara ef um er að ræða að nemendur eiga að vera í kennslu hjá kennurum sem ekki eru á fundinum.
Við hvetjum foreldra til að mæta vel á fundina. Hlökkum til að sjá ykkur.
Sjá nánara skipulag hér:


Brosdagar -
Brosdagarnir okkar í 1.-6. bekk eru núna helgaðir hreyfingu og því var valið að fara á skauta, í tarsanleik, klífa fjall og í útivistarleiki. Smáhvíld var tekin með bóklestri á bókasafni, taflmennsku og myndbandi en annars var skólinn á iði frá morgni til loka skóladags. Ef veður hamlar verður fjallaferð frestað en Norræna skólahlaupið verður haldið á föstudaginn 14. sept. en það er afmælisdagur skólans. Við erum 9 ára og eru nemendur og starfsfólk beðin um að koma spariklædd í tilefni dagsins.
Aðrir árgangar lögðu sitt af mörkum við að hreyfa sig og fara af bæ. 7.bekkur er á ferðalagi í Noregi sem lið í Nord Plus verkefninu, Energy i Norden, 8. bekkur fór í Vatnaskóg, 9. bekkur að Laugum í Sælingsdal og 10. bekkur í Landmannalaugar. Öll þessi ferðalög hafa gengið vel og nemendur staðið sig frábærlega í alla staði.
 

Myndir frá Brosdögum eru á myndasíðu sjá hér:


Músíkalst par

Borgaskóli er í hópi 10 grunnskóla í Reykjavík sem hafa gengið til samstarfs við 10 grunnskóla í Reykjavík um verkefni sem hefur það að markmiði að efla tónlistarlíf og tónlistarþátttöku skólabarna. Verkefnið hefur hlotið nafnið Músíkalst par og mun Borgaskóli vera í samvinnu við Tónskóli Hörpunnar. Við munum kynna verkefnið nánar þegar það er komið af stað.
Sjá frétt á grunnskolar.is


Frá foreldraráði
Það vantar fulltrúa í foreldraráð Borgaskóla. Með setu í ráðinu fá foreldrar
nýja og skemmtilega sýn á starfsemi skólans en fundað er reglulega með
skólastjóra. Samstarf foreldraráðs og skólastjórnenda hefur undanfarin ár
verið mjög gott. Í foreldraráði sitja 3 aðalmenn og 3 varamenn.
Það vantar 1 aðalmann og 3 varamenn. Áhugasamir hafi samband við einhvern meðlima í aðal- eða vararáði. Sjá síðu foreldraráðs:
Foreldraráð

ÚTIVISTARVIKA

Nemendur og sérgreinakennarar notuðu tækifærið til að fara út í útivistarvikunni.
5. 6. 7. og 8 bekkur fóru niður í fjöru og bjuggu til listaverk í sandinn og bökuðu brauð á teini.
3. og 4. bekkur fór út í móa og á leikvöll og þar var farið í myndastyttuleik, stórfiskaleik og Jósep segir.
2. bekkur fór fyrir neðan klettana, tíndu steina, blóm, lyng o.fl og bjuggu til listaverk.
Hér má sjá afrakstur ferðanna

HLÖKKUM TIL AÐ SJÁ YKKUR
Skólasetning Borgaskóla verður á sal skólans þann 22. ágúst:
2-4. bekkur kl. 9:00
5.-7. bekkur kl. 10:00
8.-10. bekkur kl. 11:00

Foreldrar og aðrir aðstandendur eru hjartanlega velkomnir. Nemendur 1. bekkjar verða boðaðir bréflega til viðtals með foreldrum/ forráðamönnum sínum þann 22. og 23. ágúst.
Skólastjóri


Innkaupalistar
Innkaupalistar fyrir skólaárið 2007 - 2008 eru tilbúnir.  Listana er hægt að  nálgast hér...

Allt starfsfólk Borgaskóla er boðað til fundar miðvikudaginn 15. ágúst kl. 8:30.

Sumarfrí

Skrifstofa skólans verður lokuð frá 21. júní til 10. ágúst vegna sumarleyfa. Skiptiborðið verður opið frá 1. ágúst.

Starfsfólk Borgaskóla óskar öllum nemendum skólans og fjölskyldum þeirra gleðilegs sumars og við hlökkum til að hitta ykkur á skólasetningu þann 22. ágúst:

2.-4. bekkur kl. 9:00
5.-7. bekkur kl. 10:00
8.-10. bekkur kl. 11:00

Nemendur 1. bekkjar eru boðaðir í viðtöl með foreldrum/forráðamönnum sínum 22. og 23. ágúst.
Innkaupalistar og endurskoðaðir námsvísar verða settir á netið eftir 15. ágúst



Hvatninga- og nemendaverðlaun menntaráðs
Nemendaverðlaun menntaráðs Reykjavíkur voru afhent við hátíðlega athöfn í Tjarnarsal Ráðhúss Reykjavíkur laugardaginn 9. júní. Á fjórða tug grunnskólanema fengu verðlaun. Fyrir hönd Borgaskóla tók Gísli Þór Þórðarson við nemendaverðlaunum.

Gísli Þór Þórðarson nemandi í 8. bekk Borgaskóla er óvenju vandvirkur og sjálfstæður nemandi. Hann leggur mikla alúð í alla vinnu sína og uppsker einstakan árangur. Gísli var í keppnisliði Borgaskóla í spurningakeppninni Nema hvað? í vetur. Hann hlífði sér hvergi við krefjandi undirbúning og komst liðið í úrslit þar sem það hreppti annað sætið. Gísli er góð fyrirmynd annarra ungmenna og hefur jákvæð áhrif á bekkjarfélaga og bekkjarbrag. Auk þessa er Gísli afburðaríþróttamaður, bæði í sundi og golfi. Stjórnendur og kennarar Borgaskóla eru stoltir af Gísla og vænta mikils af honum í framtíðinni.

Myndir frá útskrift 10. bekkinga

Fréttabréf
Fréttabréf Borgaskóla fyrir maí 2007 er komið út.  Bréfið má nálgast hér á pdf formi.

Gömul fréttabréf

Skóladagatal 2007 - 2008
Hér má sjá skóladagatal fyrir skólaárið 2007 - 2008

Skólaslit
Skólaslit og einkunnaafhending 10. bekkjar verður 7. júní kl. 18:00.  Foreldrar /forráðmenn og aðrir aðstandendur eru boðnir velkomnir.  Veitingar verða í boði foreldra 10. bekkinga.

Einkunnaafhending 1.-9. bekkja verður 8. júní sem hér segir:
1.-2. bekkur kl.   9:00
3.-4. bekkur kl.   9:30
5.-6.. bekkur kl.10:00
7.-9. bekkur kl. 10:30

Allar einkunnaafhendingar hefjast á sal skólans og síðan fara nemendur með umsjónarkennara sínum í bekkjarstofur.  Foreldrar/forráðmenn, aðstandendur, starfsfólk og aðrir velunnar skólans eru boðnir velkomnir með börnum sínum.